Fugl Føniks

Endringar av opningsdagar og produksjonsdag

Fugl Føniks — Tue, 09 Mar 2010 22:14:15 +0000

Dersom bedrifta Fugl Føniks skulle kunne forsvare å bruke ein driftsdag i veka til produksjon av glutenfrie brød, måtte ein få opp produksjonsvolumet. Dette ville medføre ei tung investering i fleire eltemaskiner, meir fryse- og steikekapasitet og større utstyr av oppskjæringsmaskiner. Samt ei aktiv marknadsføring og større salsapparat av glutenfrie brød. Dette ville ta mykje tid og ressursar, truleg ville ein måtte ta i bruk meir enn ein dag i veka til dette. Vi er komne fram til at Fugl Føniks er og skal fortsatt vere ein kaffibar og ikkje eit bakeri. Ein må ha minimum 5 opne driftsdagar i veka, og maks 1 produksjonsdag/administrasjonsdag der kaffibaren er stengt for publikum. Då vert det prioritert å produsere næringsmiddel for sal til våre gjestar i kaffibaren, dvs. bakst for lunsjmat og kaker. Alle kaker vil sjølvsagt framleis vere glutenfrie og ein vil finne eit glutenfritt lunsjtilbod. Produksjon av glutenfrie brød går såleis ut.

Vi vonar og trur at svært mange av våre gjestar vil sette pris på at kaffibaren frå 15.mars vil vere open også på tysdagar.

Støtt opp om stamplassen din! Kåring av “Årets beste kaffebar 2010″

Fugl Føniks — Sat, 06 Mar 2010 23:26:26 +0000

Scae (Speciality Coffee Association Europe) gjennomfører ei kåring av Noregs beste kaffibar, og det er DU som skal avgjere kva for kaffibar dette blir! Du sender inn ditt forslag med ein god grunngjevnad til arrangement@scae.no innan 25. mars. Ein jury vil gjennomgå alle kandidatane og plukke ut 10 kaffibarar som går vidare til avstemming på Scae sine nettsider. Årets Kaffibar vil bli annonsert i samband med NM Finalane i slutten av april d.å.

Legg gjerne med et bilde av din favoritt bar og forklar hvorfor akkurat denne kaffebaren bør bli Årets Kaffebar 2010.

Musikk til kaffien

Fugl Føniks — Tue, 16 Feb 2010 21:44:38 +0000

Hugsar du intimkonserten til Stig Ulv i smuget vårt ein varm og fin sommardag? Noter deg Fugl Føniks fredag 19.februar kl 1630 og utover – då kjem nemleg STIG ULV til oss og spelar sin behagelege musikk. Sjølvsagt inne denne gongen… Du har noko å gle deg til! Velkomen alle.

Fugl Føniks er Årets Handelsbedrift 2009 i Ørsta

Fugl Føniks — Sun, 07 Feb 2010 16:45:26 +0000

Prisen “Årets Handelsbedrift” er oppretta av Nordea for å betre kvaliteten og servicenivået innan handelnæringa i regionen, samt heve den generelle kunnskapen om næringa. Prisen skal tildelast den verksemda innan handelsdistriktet som best evnar å oppfylle intensjonane bak prisen: med vekt på profilering, omtale og utstillingar, vareutval og dyktige og serviceinnstilte tilsette. Kandidatane vert stemde fram av Nordea sine kundar. Juryen, som i år var sett saman av representantar frå Ørsta Næringskontor og Nordea Ørsta og Ulsteinvik, samla seg om ein vinnar som fylte føremålet med prisen på ein særs god måte.

Juryen grunngjev tildelinga med: “…Fugl Føniks har lukkast i å skape ein urban og triveleg møteplass i sentrum av Ørsta for kundar i alle aldrar”, “…med tydeleg fokus på kvalitet i alle ledd”, “…ein plass vi likar å syne fram når vi får utanbygds besøk”, “…eit levande eksempel på at nisjeverksemder med høg kvalitet kan blomstre i randsona av kjøpesenter”, “…godt kjend i heile regionen og i seg sjølv ein god grunn til å vitje Ørsta”.

Vi i Fugl Føniks kaffibar er svært takksame for prisen, og konkluderer med at med dette beviser vi at det går an å leve utanfor kjøpesentera, at konkurranse er sunt, at aktivitet skapar meir aktivitet, at vår gjennomarbeidde forretningsplan har slått til på alle nivå, at det går an å selje stemning, fellesskap og kvalitet – og at våre gjestar set pris på å bli sett og verdsett!

Tusen takk!

Ny nettside!

Fugl Føniks — Sun, 31 Jan 2010 12:12:14 +0000

Vi er stolte av å presentere Fugl Føniks sine nye nettsider! Med stor iver har arkitekten bak, grafisk designar Asgeir Hoem, møtt våre ynskje med sikker hand, gode og konstruktive idéar og stor forståing. Hjarteleg takk!

Handlaga sjokolade frå Chocoplaisir

Fugl Føniks — Sun, 31 Jan 2010 11:50:23 +0000

På Fugl Føniks kan du no kjøpe fersk og handlaga kvalitetsjokolade frå det lokale sjokolademakeriet Chocoplaisir i Brattvåg.

Sjokoladen innheld ikkje konserveringsmiddel. Reine råstoff: belgisk kvalitetssjokolade, noko smør, alkohol (ekte polvarer), glukose og fruktsyrer.

Dette er ekte handverk – har du først smakt denne sjokoladen, gløymer du han aldri!

Godt nytt år 2010!

Fugl Føniks — Wed, 30 Dec 2009 23:00:28 +0000

Vi ynskjer alle våre lojale gjestar eit godt og lukkeleg nytt år! Fugl Føniks held stengt frå torsdag 31.desember til onsdag 6.januar. Frå nyttår må du merke deg fylgjande: måndagar og tysdagar vert produksjonsdagar på Fugl Føniks. Desse dagane vil du såleis møte stengt dør. Vi blir oppe i andre etasje og bakar gjærbakst måndagar og kaker tysdagar. Onsdagar, torsdagar, fredagar og laurdagar held vi ope som vanleg frå kl 11 til kl 1730 (langdag fredagar til kl 18). Vi ser fram til eit nytt år med blanke ark! Velkomne alle!

Glutenfritt brød

Fugl Føniks — Wed, 16 Dec 2009 22:18:58 +0000

Våre grove, glutenfrie brød sel så det susar. Eit tydeleg stort behov for godt glutenfritt brød har synt seg å vere grensesprengjande. Våre brødkundar kjem frå fjern og nær. Utfordringa for oss er å ha nok steikekapasitet, og mest av alt: nok tid til å bake glutenfritt brød for sal! Våre bakedagar er no søndagar og måndagar. Vår tanke var å selje brød så lenge vi har, men behovet er større enn vi maktar å produsere. Vi vil svært truleg skaffe oss ein endå større omn, slik at vi får større volum når vi først er i gang med brødbakinga. For våre kundar kan det vere fornuftig å bestille glutenfrie brød på førehand.

Juletid

Fugl Føniks — Wed, 16 Dec 2009 22:09:01 +0000

Fugl Føniks og gjestane våre er i julemodus. Kaffibaren fløymer av herlege julegåver: kaffi i lausvekt, te med julekrydder, mandlar, sjokolade i mange variantar, tekanner, fuglføniks-t-skjorter osv. Det går litt tid i kverning av kaffi for tida! Det kan vere lurt å bestille til dømes kaffi på førehand, slik at vi kan kverne opp og lage klart. Det går ei del tid i venting, kanskje kan ein unngå dei lengste køene dersom vi får kvelden før til å kverne opp og ordne tll gåvene dine.

Opningstider jula 2009

Fugl Føniks — Wed, 16 Dec 2009 21:59:33 +0000

Torsdag 17.des: 11-1630
Fredag 18.des: 11-1800
Laurdag 19.des: 11-1630
Søndag og måndag stengt som vanleg
Tysdag 22.des: 11-1630
Onsdag 23.des: 11-1630
f.o.m 24.12.-t.o.m. 28.12.: stengt
Tysdag 29.12.: 11-1630
Onsdag 30.12.: 11-1630
f.o.m. 31.12.09 – t.o.m. tysdag 05.01.10: stengt